dil mein murat si gaDh gain aankhen

dil meñ mūrat sī gaḌh ga.iiñ āñkheñ

aap kī mujh pe paḌ ga.iiñ āñkheñ

'aks jo zehn meñ thā dhuñdhlā sā

do nagīnoñ sī jaḌ ga.iiñ āñkheñ

maiñ ne dekhī nigāh jyuuñ terī

jhaT zamīñ meñ ye gaḌ ga.iiñ āñkheñ

aaj to din hasīn guzregā

sub.h jo tum se laḌ ga.iiñ āñkheñ

aag bhaḌkī jo un ke laḌne se

ḳhud bujhāne ko aḌ ga.iiñ āñkheñ

mere dil ke hasīn ḳhvāboñ ko

ik kahānī sā paḌh ga.iiñ āñkheñ

vaqt-e-āḳhir hai vo haiñ sir.hāne

ye 'nayā' maan chaḌh ga.iiñ āñkheñ

dil mein murat si gaDh gain aankhen

aap ki mujh pe paD gain aankhen

'aks jo zehn mein tha dhundhla sa

do naginon si jaD gain aankhen

main ne dekhi nigah jyun teri

jhaT zamin mein ye gaD gain aankhen

aaj to din hasin guzrega

subh jo tum se laD gain aankhen

aag bhaDki jo un ke laDne se

KHud bujhane ko aD gain aankhen

mere dil ke hasin KHwabon ko

ek kahani sa paDh gain aankhen

waqt-e-aKHir hai wo hain sirhane

ye 'naya' man chaDh gain aankhen