dil mein paida hui bala ki KHalish

dil meñ paidā huī balā kī ḳhalish

uf tire nāvak-e-adā kī ḳhalish

kuchh dil-e-dard-āshnā kī ḳhalish

kuchh tire nāvak-e-jafā kī ḳhalish

donoñ bāteñ jo ho ga.iiñ bāham

dil meñ paidā huī balā kī ḳhalish

maut ne dil ko ik sukūñ baḳhshā

muddatoñ tak rahī davā kī ḳhalish

dil meñ nāsūr paḌ ga.e lākhoñ

aah ye āh-e-nā-rasā kī ḳhalish

ḳhanjar-o-tīr se sivā paa.ī

ishva-o-ġhamza-o-adā kī ḳhalish

zabt ko mere sabr ko mere

āzmāne lagī vafā kī ḳhalish

maraz-e-ishq ke marīzoñ ko

maar Dālegī ye shifā kī ḳhalish

na milegā kahīñ nishāñ apnā

gar yahī hai tirī jafā kī ḳhalish

dekheñ anjām ishq kā kyā ho

ibtidā meñ hai intihā kī ḳhalish

ho ga.ī dam ke baad ruḳhsat ziist

dekh saktī na thī qazā kī ḳhalish

rag-e-jāñ kaT ga.ī magar 'mas.ūd'

na ga.ī teġh-āzmā kī ḳhalish

dil mein paida hui bala ki KHalish

uf tere nawak-e-ada ki KHalish

kuchh dil-e-dard-ashna ki KHalish

kuchh tere nawak-e-jafa ki KHalish

donon baaten jo ho gain baham

dil mein paida hui bala ki KHalish

maut ne dil ko ek sukun baKHsha

muddaton tak rahi dawa ki KHalish

dil mein nasur paD gae lakhon

aah ye aah-e-na-rasa ki KHalish

KHanjar-o-tir se siwa pai

ishwa-o-ghamza-o-ada ki KHalish

zabt ko mere sabr ko mere

aazmane lagi wafa ki KHalish

maraz-e-ishq ke marizon ko

mar Dalegi ye shifa ki KHalish

na milega kahin nishan apna

gar yahi hai teri jafa ki KHalish

dekhen anjam ishq ka kya ho

ibtida mein hai intiha ki KHalish

ho gai dam ke baad ruKHsat zist

dekh sakti na thi qaza ki KHalish

rag-e-jaan kaT gai magar 'masud'

na gai tegh-azma ki KHalish