dil mein rahna hai pareshan KHayalon ka hujum

dil meñ rahnā hai pareshān ḳhayāloñ kā hujūm

aur āñkhoñ meñ qayāmat kā samāñ rahtā hai

ishq ke raaz ko jitnā meñ nihāñ rakhtā huuñ

ḳhāmushī se mirī utnā hī ayaañ rahtā hai

rotā rahtā huuñ kisī ġham-zada ke rone par

aur dil-e-markaz-e-ālām jahāñ rahtā hai

rif.at-e-fikr hai hāsil mujhe ulfat ke tufail

jo na ye ho to kahāñ husn-e-bayāñ rahtā hai

lāla-kārī kā salīqa bhī nigah ko aayā

āñsuoñ kī jagah ab ḳhuun ravāñ rahtā hai

kashtī-e-zīst hai girdāb-e-balā meñ 'sā.ib'

āj-kal nām-e-ḳhudā vird-e-zabāñ rahtā hai

dil mein rahna hai pareshan KHayalon ka hujum

aur aankhon mein qayamat ka saman rahta hai

ishq ke raaz ko jitna mein nihan rakhta hun

KHamushi se meri utna hi ayan rahta hai

rota rahta hun kisi gham-zada ke rone par

aur dil-e-markaz-e-alam jahan rahta hai

rifat-e-fikr hai hasil mujhe ulfat ke tufail

jo na ye ho to kahan husn-e-bayan rahta hai

lala-kari ka saliqa bhi nigah ko aaya

aansuon ki jagah ab KHun rawan rahta hai

kashti-e-zist hai girdab-e-bala mein 'saib'

aaj-kal nam-e-KHuda wird-e-zaban rahta hai