dil mein shoala sa uTha ho jaise

dil meñ sho.ala sā uThā ho jaise

tuur lau de ke jalā ho jaise

vo mire paas se ho kar guzre

sub.h-dam bād-e-sabā ho jaise

ab to roke nahīñ rukte aañsū

aabla phuuT gayā ho jaise

un kī ḳhāmosh nigāhoñ se mujhe

koī paiġhām milā ho jaise

be-sabab kyoñ mirī āñkheñ nam haiñ

us ne phir yaad kiyā ho jaise

ġhunche gulshan meñ hañse ḳhuub hañse

merā afsāna sunā ho jaise

so gayā chhāñv meñ zulfoñ kī 'tarab'

koī rahgīr thakā ho jaise

dil mein shoala sa uTha ho jaise

tur lau de ke jala ho jaise

wo mere pas se ho kar guzre

subh-dam baad-e-saba ho jaise

ab to roke nahin rukte aansu

aabla phuT gaya ho jaise

un ki KHamosh nigahon se mujhe

koi paigham mila ho jaise

be-sabab kyon meri aankhen nam hain

us ne phir yaad kiya ho jaise

ghunche gulshan mein hanse KHub hanse

mera afsana suna ho jaise

so gaya chhanw mein zulfon ki 'tarab'

koi rahgir thaka ho jaise