dil mein shola tha so aankhon mein nami banta gaya

dil meñ shola thā so āñkhoñ meñ namī bantā gayā

dard kā benām jugnū raushnī bantā gayā

ek aañsū ajnabiyat kā nadī bantā gayā

ek lamha thā takalluf kā sadī bantā gayā

kyā labālab roz o shab the aur kyā vahshī thā maiñ

zindagī se duur ho kar aadmī bantā gayā

kab junūñ meñ khiñch ga.ī pairoñ se arz-e-e'tidāl

aur ik yūñhī sā jazba āshiqī bantā gayā

rafta rafta tīrgī ne dasht-e-jāñ sar kar liyā

raushnī kā har fasāna an-kahī bantā gayā

zindagī ne kaise rāzoñ kī piTārī khol dī

āgahī kā har tayaqqun gumrahī bantā gayā

shahr kā chehra samajh kar dekhte the sab use

aur vo ḳhud se bhī 'shahpar' ajnabī bantā gayā

dil mein shola tha so aankhon mein nami banta gaya

dard ka benam jugnu raushni banta gaya

ek aansu ajnabiyat ka nadi banta gaya

ek lamha tha takalluf ka sadi banta gaya

kya labaalab roz o shab the aur kya wahshi tha main

zindagi se dur ho kar aadmi banta gaya

kab junun mein khinch gai pairon se arz-e-e'tidal

aur ek yunhi sa jazba aashiqi banta gaya

rafta rafta tirgi ne dasht-e-jaan sar kar liya

raushni ka har fasana an-kahi banta gaya

zindagi ne kaise raazon ki piTari khol di

aagahi ka har tayaqqun gumrahi banta gaya

shahr ka chehra samajh kar dekhte the sab use

aur wo KHud se bhi 'shahpar' ajnabi banta gaya