dil mein utre na udasi se bhari kahlae

dil meñ utre na udāsī se bharī kahlā.e

koī to shaam ho aisī jo na.ī kahlā.e

ek āvāz jo āñkhoñ ke liye chashma ho

ek ehsās jo hāthoñ kī chhaḌī kahlā.e

hindse sūiyāñ phir merī kalā.ī pe khiñcheñ

vaqt donoñ kā ghaḌī sirf tirī kahlā.e

ik nazar hī meñ use dekh liyā hai itnā

aañkh ḳhālī bhī agar ho to bharī kahlā.e

dāstāñ bantī ga.ī dev meñ Dhaltā gayā maiñ

us kī ḳhvāhish thī ki vo ḳhud bhī parī kahlā.e

dil meñ uḌtā ye udāsī kā parinda 'shāriq'

shāḳh-e-lab par kabhī baiThe to hañsī kahlā.e

dil mein utre na udasi se bhari kahlae

koi to sham ho aisi jo nai kahlae

ek aawaz jo aankhon ke liye chashma ho

ek ehsas jo hathon ki chhaDi kahlae

hindse suiyan phir meri kalai pe khinchen

waqt donon ka ghaDi sirf teri kahlae

ek nazar hi mein use dekh liya hai itna

aankh KHali bhi agar ho to bhari kahlae

dastan banti gai dew mein Dhalta gaya main

us ki KHwahish thi ki wo KHud bhi pari kahlae

dil mein uDta ye udasi ka parinda 'shaariq'

shaKH-e-lab par kabhi baiThe to hansi kahlae