dil mein wo bahr-e-latafat jalwa-farma ho gaya

dil meñ vo bahr-e-latāfat jalva-farmā ho gayā

band kis ḳhūbī se is kuuze meñ dariyā ho gayā

jab milā banda ḳhudā se kyā kahūñ kyā ho gayā

qatra dariyā meñ pahuñch kar ain dariyā ho gayā

naddiyāñ aisī mire ashk-e-nadāmat se bahīñ

arsa-e-mehshar meñ ek tūfān barpā ho gayā

bād-e-ġhusl ab jāma-e-nau aqrabā pahnā.eñge

raḳht-e-hastī terā duniyā meñ purānā ho gayā

o sitamgar ho gayā terā qatīl-e-nāz sard

le kaleja terā qātil ab to ThanDā ho gayā

donoñ aalam ke tamāshe is meñ aate haiñ nazar

jām-e-jam hai dil kisī kā gar musaffā ho gayā

kahte haiñ kyā muñh lagā kar nuqta-e-mauhūm se

khul gayā uqda dahan kā tū jo goyā ho gayā

kullo-shai.in yarji’u ke khul ga.e ma.anī mujhe

maiñ musāfir jis ghaḌī mulk-e-baqā kā ho gayā

jab paḌī 'akbar' nazar apnī jamāl-e-yār par

dīda-e-mushtāq apnā chashm-e-mūsā ho gayā

dil mein wo bahr-e-latafat jalwa-farma ho gaya

band kis KHubi se is kuze mein dariya ho gaya

jab mila banda KHuda se kya kahun kya ho gaya

qatra dariya mein pahunch kar ain dariya ho gaya

naddiyan aisi mere ashk-e-nadamat se bahin

arsa-e-mehshar mein ek tufan barpa ho gaya

baad-e-ghusl ab jama-e-nau aqraba pahnaenge

raKHt-e-hasti tera duniya mein purana ho gaya

o sitamgar ho gaya tera qatil-e-naz sard

le kaleja tera qatil ab to ThanDa ho gaya

donon aalam ke tamashe is mein aate hain nazar

jam-e-jam hai dil kisi ka gar musaffa ho gaya

kahte hain kya munh laga kar nuqta-e-mauhum se

khul gaya uqda dahan ka tu jo goya ho gaya

kullo-shain yarji’u ke khul gae mani mujhe

main musafir jis ghaDi mulk-e-baqa ka ho gaya

jab paDi 'akbar' nazar apni jamal-e-yar par

dida-e-mushtaq apna chashm-e-musa ho gaya