dil mein wo kaifiyat-e-nashsha-e-sahba hi nahin

dil meñ vo kaifiyat-e-nashsha-e-sahbā hī nahīñ

darpai-e-hosh nigāh-e-tarab-afzā hī nahīñ

lāla-o-gul meñ kashish hai na mah-o-anjum meñ

ab nigāhoñ pe hijābāt-e-tamanna hī nahīñ

is tarah mujh se taḳhātub hai ki jaise maiñ ne

chashm-e-mushtāq se un ko kabhī dekhā hī nahīñ

kyā bane koī harīf-e-nigah-e-sehr-tarāz

himmat-afzā koī dar-parda ishārā hī nahīñ

dāman-e-ġham bhī kahīñ chhūT na jaa.e hamdam

zindagī ke liye phir koī sahārā hī nahīñ

is qadar ḳhūgar-e-bedād kiyā duniyā ne

ab mujhe shikva-e-be-mehrī-e-duniyā hī nahīñ

dil hai ḳhuuñ ruuh hai betāb nazar hai ḳhīra

ham ye samjhe the ki pādāsh-e-tamanna hī nahīñ

chashm-e-mushtāq se ghabrā ga.ī chashm-e-ḳhandāñ

merī nazroñ ko taqāze kā salīqa hī nahīñ

kyā kareñ gar na ji.eñ kausar-o-tūbā ke liye

jin ġharīboñ ke liye rāht-e-duniyā hī nahīñ

dil mein wo kaifiyat-e-nashsha-e-sahba hi nahin

darpai-e-hosh nigah-e-tarab-afza hi nahin

lala-o-gul mein kashish hai na mah-o-anjum mein

ab nigahon pe hijabaat-e-tamanna hi nahin

is tarah mujh se taKHatub hai ki jaise main ne

chashm-e-mushtaq se un ko kabhi dekha hi nahin

kya bane koi harif-e-nigah-e-sehr-taraaz

himmat-afza koi dar-parda ishaara hi nahin

daman-e-gham bhi kahin chhuT na jae hamdam

zindagi ke liye phir koi sahaara hi nahin

is qadar KHugar-e-bedad kiya duniya ne

ab mujhe shikwa-e-be-mehri-e-duniya hi nahin

dil hai KHun ruh hai betab nazar hai KHira

hum ye samjhe the ki padash-e-tamanna hi nahin

chashm-e-mushtaq se ghabra gai chashm-e-KHandan

meri nazron ko taqaze ka saliqa hi nahin

kya karen gar na jien kausar-o-tuba ke liye

jin gharibon ke liye raht-e-duniya hi nahin