dil mein yun jalte hain yaadon ke sahaaron ke charagh

dil meñ yuuñ jalte haiñ yādoñ ke sahāroñ ke charāġh

jaise raushan hoñ sar-e-shām sitāroñ ke charāġh

abhī jaao shab-e-furqat kā ujālā ban kar

ab to maddham hue jaate haiñ sitāroñ ke charāġh

shab-e-tārīk se ai qāfile vaalo na Daro

haiñ mire naqsh-e-qadam rāh-guzāroñ ke charāġh

kis jagah haa.e sar-e-shām safīna Duubā

jab bahut paas nazar aa.e kināroñ ke charāġh

yuuñ pata dete haiñ manzil kā tire naqsh-e-qadam

jaise bhaTke hue raahī ko dayāroñ ke charāġh

gar yahī hai ravish-e-ahl-e-gulistāñ to 'qavī'

jal sakeñge na gulistāñ meñ bahāroñ ke charāġh

dil mein yun jalte hain yaadon ke sahaaron ke charagh

jaise raushan hon sar-e-sham sitaron ke charagh

abhi jao shab-e-furqat ka ujala ban kar

ab to maddham hue jate hain sitaron ke charagh

shab-e-tarik se ai qafile walo na Daro

hain mere naqsh-e-qadam rah-guzaron ke charagh

kis jagah hae sar-e-sham safina Duba

jab bahut pas nazar aae kinaron ke charagh

yun pata dete hain manzil ka tere naqsh-e-qadam

jaise bhaTke hue rahi ko dayaron ke charagh

gar yahi hai rawish-e-ahl-e-gulistan to 'qawi'

jal sakenge na gulistan mein bahaaron ke charagh