dil mera le ke ye kahte hain ki mal achchha hai

dil mirā le ke ye kahte haiñ ki maal achchhā hai

minnateñ ḳhuub haiñ aur un kā ḳhayāl achchhā hai

vo ayādat ko mirī aa ke ye farmāte haiñ

shukr-sad-shukr ki bīmār kā haal achchhā hai

maiñ ye kahtā huuñ ki āġhāz-e-mohabbat hai ḳharāb

vo ye kahte haiñ ki mohabbat kā ma.aal achchhā hai

saath yūsuf ke tujhe misr meñ gar le jaate

uñgliyāñ terī taraf uThtīñ ye maal achchhā hai

terī sūrat se maiñ duuñ kyā mah-e-kāmil ko misāl

us se sau darja tirā husn-o-jamāl achchhā hai

dil ko duzdīda nigāhoñ se churā le jaanā

tum meñ itnā hī mirī jaan kamāl achchhā hai

vo ayādat ke liye ġhair ke ghar jaate haiñ

ham mare jaate haiñ kambaḳht kā haal achchhā hai

TuuT jaane kā na kuchh ranj na kho jaane kā

ham ġharīboñ kā yahī jām-e-sifāl achchhā hai

apnī qismat meñ kahāñ rāhat-o-ārām nashāt

'ranj' duniyā meñ yahī ham ko malāl achchhā hai

dil mera le ke ye kahte hain ki mal achchha hai

minnaten KHub hain aur un ka KHayal achchha hai

wo ayaadat ko meri aa ke ye farmate hain

shukr-sad-shukr ki bimar ka haal achchha hai

main ye kahta hun ki aaghaz-e-mohabbat hai KHarab

wo ye kahte hain ki mohabbat ka maal achchha hai

sath yusuf ke tujhe misr mein gar le jate

ungliyan teri taraf uThtin ye mal achchha hai

teri surat se main dun kya mah-e-kaamil ko misal

us se sau darja tera husn-o-jamal achchha hai

dil ko duzdida nigahon se chura le jaana

tum mein itna hi meri jaan kamal achchha hai

wo ayaadat ke liye ghair ke ghar jate hain

hum mare jate hain kambaKHt ka haal achchha hai

TuT jaane ka na kuchh ranj na kho jaane ka

hum gharibon ka yahi jam-e-sifal achchha hai

apni qismat mein kahan rahat-o-aram nashat

'ranj' duniya mein yahi hum ko malal achchha hai