dil murid-e-ilzam-e-wafa aur bhi nikla

dil mūrid-e-ilzām-e-vafā aur bhī niklā

ik ġham ġham-e-daurāñ ke sivā aur bhī niklā

yuuñ hone ko ham se hai ḳhafā saarā zamāna

ik shaḳhs magar ham se ḳhafā aur bhī niklā

har-chand ki ham karda ḳhatāoñ pe the nādim

duniyā ko magar ham se gilā aur bhī niklā

pahle hī se barham-kun-e-mahfil thī tabī.at

māhaul magar ham se ḳhafā aur bhī niklā

is baar vo dekheñ karam-āmāda nigāheñ

juz hijr-e-mohabbat kā sila aur bhī niklā

le aa.ī thī zindāñ meñ shahīdoñ kī mohabbat

lekin sabab-e-jurm-o-sazā aur bhī niklā

ham vo ki jo rāzī-ba-razā ho nahīñ sakte

har hukm pe hoñToñ se gilā aur bhī niklā

dil murid-e-ilzam-e-wafa aur bhi nikla

ek gham gham-e-dauran ke siwa aur bhi nikla

yun hone ko hum se hai KHafa sara zamana

ek shaKHs magar hum se KHafa aur bhi nikla

har-chand ki hum karda KHataon pe the nadim

duniya ko magar hum se gila aur bhi nikla

pahle hi se barham-kun-e-mahfil thi tabiat

mahaul magar hum se KHafa aur bhi nikla

is bar wo dekhen karam-amada nigahen

juz hijr-e-mohabbat ka sila aur bhi nikla

le aai thi zindan mein shahidon ki mohabbat

lekin sabab-e-jurm-o-saza aur bhi nikla

hum wo ki jo raazi-ba-raza ho nahin sakte

har hukm pe honTon se gila aur bhi nikla