dil na lo dil ka ye lena hai na iKHfa hoga

dil na lo dil kā ye lenā hai na iḳhfā hogā

is ko dil kahte haiñ bas lete hī charchā hogā

tum ko har aan udhar hovegī husn-ārā.ī

ham ko har lahza idhar zauq-e-tamāshā hogā

ham bhī sau chaah se dekheñge tumhārī jānib

tum se bhī zabt-e-tabassum na phir aslā hogā

juuñ hī ham dekheñge tum aur tabassum hoge

chaah kā ġhuncha-e-sar-basta vahīñ vā hogā

guftugū hovegī bāham jo ishārāt ke saath

matn is kā bhī harīfoñ meñ muhashshā hogā

paañv tak haath jo lāveñge kisī uzr se ham

tāḌne vāloñ meñ shor is kā bhī barpā hogā

jab ye taqrīr sunī us shah-e-ḳhūbāñ ne 'nazīr'

ham se dil le liyā aur hañs ke kahā kyā hogā

dil na lo dil ka ye lena hai na iKHfa hoga

is ko dil kahte hain bas lete hi charcha hoga

tum ko har aan udhar howegi husn-arai

hum ko har lahza idhar zauq-e-tamasha hoga

hum bhi sau chah se dekhenge tumhaari jaanib

tum se bhi zabt-e-tabassum na phir asla hoga

jun hi hum dekhenge tum aur tabassum hoge

chah ka ghuncha-e-sar-basta wahin wa hoga

guftugu howegi baham jo ishaaraat ke sath

matn is ka bhi harifon mein muhashsha hoga

panw tak hath jo lawenge kisi uzr se hum

taDne walon mein shor is ka bhi barpa hoga

jab ye taqrir suni us shah-e-KHuban ne 'nazir'

hum se dil le liya aur hans ke kaha kya hoga