dil-nashin hai naqsh teri shoKHi-e-tahrir ka

dil-nashīñ hai naqsh terī shoḳhi-e-tahrīr kā

miTnā to anjām hai har paikar-e-tasvīr kā

zor-e-vahshat ho gayā rusvā sar-e-sahrā-e-shauq

hañs rahā hai mujh pe har halqa mirī zanjīr kā

dekh kar mujh ko muqābil dekh kar apnā harīf

dekh le vo uḌ gayā paanī tirī shamshīr kā

har shikan bistar kī hai ā.īna-dār-e-kaifiyat

raat bhar jhagḌā rahā taqdīr se tadbīr kā

apnī barbādī pe ḳhush hone kā kuchh sāmān kar

koī pahlū DhūñD le taḳhrīb meñ ta.amīr kā

yaad āye.gā ḳhudā us ko mire marne ke baad

maiñ to īmāñ le ke Dūbūñgā but-e-be-pīr kā

shā.erī tarz-e-suḳhan meñ 'ḳhizr' kuchh āsāñ nahīñ

sher kah lenā bhī to laanā hai jū-e-shīr kā

dil-nashin hai naqsh teri shoKHi-e-tahrir ka

miTna to anjam hai har paikar-e-taswir ka

zor-e-wahshat ho gaya ruswa sar-e-sahra-e-shauq

hans raha hai mujh pe har halqa meri zanjir ka

dekh kar mujh ko muqabil dekh kar apna harif

dekh le wo uD gaya pani teri shamshir ka

har shikan bistar ki hai aaina-dar-e-kaifiyat

raat bhar jhagDa raha taqdir se tadbir ka

apni barbaadi pe KHush hone ka kuchh saman kar

koi pahlu DhunD le taKHrib mein tamir ka

yaad aayega KHuda us ko mere marne ke baad

main to iman le ke Dubunga but-e-be-pir ka

shaeri tarz-e-suKHan mein 'KHizr' kuchh aasan nahin

sher kah lena bhi to lana hai ju-e-shir ka