dil ne kaha tha kafi pahle ishq ka ek afsana likh

dil ne kahā thā kaafī pahle ishq kā ik afsāna likh

begānoñ ko apnā likh de apnoñ ko begāna likh

pichhlī rutoñ meñ ḳhuun kī bārish āñkhoñ se jab barsī thī

us manzar kā aks banā us aks pe tū dīvāna likh

jaltī bujhtī sham.a sahar tak jaise taise chaltī hai

jo lamhoñ meñ ḳhaak huā hai likh us ko parvāna likh

dīvāne the ham donoñ hī apne meñ ḳhush rahte the

biich meñ jis ne nafrat boī tū us ko farzāna likh

sher meñ aksar bāteñ sattar sattar ma.anī rakhtī haiñ

pardoñ kā ye jhanjhaT chhoḌ de jur.at kar rindāna likh

in āñkhoñ ne kaise kaise manzar dekhe duniyā meñ

duniyā-dārī karnī hai to āñkhoñ ko tah-ḳhāna likh

'dānish' tū ne ḳhuub likhā hai lafzoñ se bhī khelā hai

lekin jo bedār hue un zaḳhmoñ kā jurmāna likh

dil ne kaha tha kafi pahle ishq ka ek afsana likh

beganon ko apna likh de apnon ko begana likh

pichhli ruton mein KHun ki barish aankhon se jab barsi thi

us manzar ka aks bana us aks pe tu diwana likh

jalti bujhti shama sahar tak jaise taise chalti hai

jo lamhon mein KHak hua hai likh us ko parwana likh

diwane the hum donon hi apne mein KHush rahte the

bich mein jis ne nafrat boi tu us ko farzana likh

sher mein aksar baaten sattar sattar mani rakhti hain

pardon ka ye jhanjhaT chhoD de jurat kar rindana likh

in aankhon ne kaise kaise manzar dekhe duniya mein

duniya-dari karni hai to aankhon ko tah-KHana likh

'danish' tu ne KHub likha hai lafzon se bhi khela hai

lekin jo bedar hue un zaKHmon ka jurmana likh