dil ne subu to aankh ne saghar uTha liya

dil ne subū to aañkh ne sāġhar uThā liyā

donoñ ne apnā apnā muqaddar uThā liyā

maazī kā phuul haal kā patthar uThā liyā

jo mil gayā ġhazal kī zamīñ par uThā liyā

majbūriyoñ kā us kī kuchh andāza kījiye

kāñTe ko jis ne phuul samajh kar uThā liyā

itnī chamak thī ashk-e-ġham-e-rozgār meñ

har qatre ko samajh ke maiñ gauhar uThā liyā

kyoñ laġhzish-e-qadam ko maiñ apnī duā na duuñ

mujh ko kisī ne haath baḌhā kar uThā liyā

jab bujh sakī na pyaas to pyāsī nigāh ne

āñkhoñ meñ band kar ke samundar uThā liyā

jis se na uTh sakī kabhī ik shāḳh-e-gul 'nasīb'

hairat hai aise haath ne ḳhanjar uThā liyā

dil ne subu to aankh ne saghar uTha liya

donon ne apna apna muqaddar uTha liya

mazi ka phul haal ka patthar uTha liya

jo mil gaya ghazal ki zamin par uTha liya

majburiyon ka us ki kuchh andaza kijiye

kanTe ko jis ne phul samajh kar uTha liya

itni chamak thi ashk-e-gham-e-rozgar mein

har qatre ko samajh ke main gauhar uTha liya

kyon laghzish-e-qadam ko main apni dua na dun

mujh ko kisi ne hath baDha kar uTha liya

jab bujh saki na pyas to pyasi nigah ne

aankhon mein band kar ke samundar uTha liya

jis se na uTh saki kabhi ek shaKH-e-gul 'nasib'

hairat hai aise hath ne KHanjar uTha liya