dil-o-dilbar sahi ab KHwab se bedar hain donon

dil-o-dilbar sahī ab ḳhvāb se bedār haiñ donoñ

sharīk-e-majlis-e-ārā.ish-e-guftār haiñ donoñ

chaman meñ kyā huā gulchīñ ho bāgul-kār kyā jaane

nazar aatā nahīñ kuchh nargis-e-bīmār haiñ donoñ

nigāh-e-ahl-e-duniyā ho ki chashm-e-nīm-ḳhvāb un kī

kabhī iqrār haiñ donoñ kabhī inkār haiñ donoñ

ibādat-ḳhāna-hā-e-kufr-o-īmāñ meñ gayā lekin

nidā aa.ī ki vāpas jā yahāñ ġhaddār haiñ donoñ

jidhar daulat kī kirneñ haiñ udhar jaatā nahīñ koī

vo āshiq ho ki shā.ir sāya-e-dīvār haiñ donoñ

darūn-e-halqa-e-gañg-o-jaman hai sher kī duniyā

ye dillī lucknow bhī kuchh nahīñ is paar haiñ donoñ

taġhāful kī adā ho yā hukūmat kī adākārī

burā kis ko kahūñ mere liye sarkār haiñ donoñ

dil-o-dilbar sahi ab KHwab se bedar hain donon

sharik-e-majlis-e-araish-e-guftar hain donon

chaman mein kya hua gulchin ho bagul-kar kya jaane

nazar aata nahin kuchh nargis-e-bimar hain donon

nigah-e-ahl-e-duniya ho ki chashm-e-nim-KHwab un ki

kabhi iqrar hain donon kabhi inkar hain donon

ibaadat-KHana-ha-e-kufr-o-iman mein gaya lekin

nida aai ki wapas ja yahan ghaddar hain donon

jidhar daulat ki kirnen hain udhar jata nahin koi

wo aashiq ho ki shair saya-e-diwar hain donon

darun-e-halqa-e-gang-o-jaman hai sher ki duniya

ye dilli lucknow bhi kuchh nahin is par hain donon

taghaful ki ada ho ya hukumat ki adakari

bura kis ko kahun mere liye sarkar hain donon