dil-o-dimagh mein kaisa bhanwar bana hua hai

dil-o-dimāġh meñ kaisā bhañvar banā huā hai

zamīr mere liye dard-e-sar banā huā hai

maiñ apnī chhat ke liye kāTtā zarūr magar

shajar meñ kitne parindoñ kā ghar banā huā hai

tum is bharose ko phir se bhī toḌ sakte ho

jo taaza taaza abhī TuuT kar banā huā hai

kahīñ to naqb lagātī haiñ rāt-din sāñseñ

fasīl-e-zāt meñ koī to dar banā huā hai

maiñ kaise mom karūñ mom jaise shaḳhs ko bhī

vo jān-būjh ke patthar agar banā huā hai

lagegī der use ret par utārne meñ

vahī jo naqsh abhī aap par banā huā hai

hamāre dard ke qisse bayān kar kar ke

suḳhnavaroñ meñ baḌā mo'atabar banā huā hai

maiñ apnī had se tajāvuz karūñ to kaise karūñ

mirā mazār mirī zaat par banā huā hai

dil-o-dimagh mein kaisa bhanwar bana hua hai

zamir mere liye dard-e-sar bana hua hai

main apni chhat ke liye kaTta zarur magar

shajar mein kitne parindon ka ghar bana hua hai

tum is bharose ko phir se bhi toD sakte ho

jo taza taza abhi TuT kar bana hua hai

kahin to naqb lagati hain raat-din sansen

fasil-e-zat mein koi to dar bana hua hai

main kaise mom karun mom jaise shaKHs ko bhi

wo jaan-bujh ke patthar agar bana hua hai

lagegi der use ret par utarne mein

wahi jo naqsh abhi aap par bana hua hai

hamare dard ke qisse bayan kar kar ke

suKHnawaron mein baDa mo'atabar bana hua hai

main apni had se tajawuz karun to kaise karun

mera mazar meri zat par bana hua hai