dil-o-jigar to kisi dilruba ne luT liya

dil-o-jigar to kisī dilrubā ne luuT liyā

bachī thī jaan so us ko qazā ne luuT liyā

dikhā ke dast-e-hinā.ī vo hañs ke kahte haiñ

shafaq ke rang ko rang-e-hinā ne luuT liyā

guzar ga.ī yūñhī chup-chāp haa.e saarī raat

mazā visāl kā sharm-o-hayā ne luuT liyā

sunā ke naġhma-e-dilkash kabhī dikhā ke jhalak

hamāre dil ko kisī dilrubā ne luuT liyā

havās-o-hosh ko gum kar diyā hai ulfat ne

qarār-o-zabt ko nāz-o-adā ne luuT liyā

hamārā naaz kā paalā huā thā dil hamdam

use nasīb se ik dilrubā ne luuT liyā

sadā-e-haq jo thī 'sanjar' jahāñ meñ guuñj uThī

zabāñ se lafz jo niklā sabā ne luuT liyā

dil-o-jigar to kisi dilruba ne luT liya

bachi thi jaan so us ko qaza ne luT liya

dikha ke dast-e-hinai wo hans ke kahte hain

shafaq ke rang ko rang-e-hina ne luT liya

guzar gai yunhi chup-chap hae sari raat

maza visal ka sharm-o-haya ne luT liya

suna ke naghma-e-dilkash kabhi dikha ke jhalak

hamare dil ko kisi dilruba ne luT liya

hawas-o-hosh ko gum kar diya hai ulfat ne

qarar-o-zabt ko naz-o-ada ne luT liya

hamara naz ka pala hua tha dil hamdam

use nasib se ek dilruba ne luT liya

sada-e-haq jo thi 'sanjar' jahan mein gunj uThi

zaban se lafz jo nikla saba ne luT liya