dil-o-nazar pe koi iKHtiyar bhi to nahin

dil-o-nazar pe koī iḳhtiyār bhī to nahīñ

ye shutar aise magar be-mahār bhī to nahīñ

manā hī lete use ham kaḌī riyāzat se

vo zūd-ranj ki parvardigār bhī to nahīñ

na jaane kyoñ hameñ sharmindagī hai maazī par

agarche aisā koī dāġhdār bhī to nahīñ

ye kaifiyat ki koī sarḳhushī nahīñ lekin

tirī judā.ī tabī.at pe baar bhī to nahīñ

hisāb-e-sūd-o-ziyāñ kis tarah se mumkin ho

huzūr ishq koī kārobār bhī to nahīñ

ta.alluqāt meñ kaise koī tanāsub ho

koī halīm koī burdbār bhī to nahīñ

kahāñ paḌāv kareñ kis ke āsare pe kareñ

ki duur tak shajar sāya-dār bhī to nahīñ

maqām-e-faiz milā aur na ham hue mansūr

hamārī manzil-e-maqsūd daar bhī to nahīñ

gunah savāb shahīd-o-yazīd che ma.anī

ye qatl-gāh koī kār-zār bhī to nahīñ

dil-o-nazar pe koi iKHtiyar bhi to nahin

ye shutar aise magar be-mahaar bhi to nahin

mana hi lete use hum kaDi riyazat se

wo zud-ranj ki parwardigar bhi to nahin

na jaane kyon hamein sharmindagi hai mazi par

agarche aisa koi daghdar bhi to nahin

ye kaifiyat ki koi sarKHushi nahin lekin

teri judai tabiat pe bar bhi to nahin

hisab-e-sud-o-ziyan kis tarah se mumkin ho

huzur ishq koi karobar bhi to nahin

talluqat mein kaise koi tanasub ho

koi halim koi burdbar bhi to nahin

kahan paDaw karen kis ke aasare pe karen

ki dur tak shajar saya-dar bhi to nahin

maqam-e-faiz mila aur na hum hue mansur

hamari manzil-e-maqsud dar bhi to nahin

gunah sawab shahid-o-yazid che mani

ye qatl-gah koi kar-zar bhi to nahin