dil-o-nigah ki sari latafaten bhi gain

dil-o-nigāh kī saarī latāfateñ bhī ga.iiñ

basīratoñ kī talab meñ basārteñ bhī ga.iiñ

ga.e dinoñ kī jahāñ tak amānateñ bhī ga.iiñ

na.ī rutoñ kī mahaktī bashārateñ bhī ga.iiñ

samā.atoñ kī fasīleñ to phāñd aa.ī sadā

kabhī hisār-e-sadā tak samā.ateñ bhī ga.iiñ

mirī kathā jo ga.ī tā-dayār-e-shīsha-o-sang

lahūluhān diloñ kī hikāyateñ bhī ga.iiñ

harā-bharā mujhe rakhtī thiiñ jo har ik rut meñ

vo shāḳh-sār-e-badan kī harārateñ bhī ga.iiñ

ġhazal kā sadiyoñ purānā libās yuuñ badlā

ki fikr-o-fan kī mohazzab rivāyateñ bhī ga.iiñ

ba-nām-e-dard mire dil ko jo mayassar thiiñ

'atīq' ab to vo be-nām rāhateñ bhī ga.iiñ

dil-o-nigah ki sari latafaten bhi gain

basiraton ki talab mein basarten bhi gain

gae dinon ki jahan tak amanaten bhi gain

nai ruton ki mahakti bashaaraten bhi gain

samaaton ki fasilen to phand aai sada

kabhi hisar-e-sada tak samaaten bhi gain

meri katha jo gai ta-dayar-e-shisha-o-sang

lahuluhan dilon ki hikayaten bhi gain

hara-bhara mujhe rakhti thin jo har ek rut mein

wo shaKH-sar-e-badan ki hararaten bhi gain

ghazal ka sadiyon purana libas yun badla

ki fikr-o-fan ki mohazzab riwayaten bhi gain

ba-nam-e-dard mere dil ko jo mayassar thin

'atiq' ab to wo be-nam rahaten bhi gain