dil par nigah-e-naz ka jadu jo chal gaya

dil par nigāh-e-nāz kā jaadū jo chal gayā

vo sarhad-e-shu.ūr se aage nikal gayā

chhat par mirī utartī nahīñ dhuup āj-kal

sūraj mire ḳhilāf koī chaal chal gayā

logoñ ne mujh ko apnī nazar se girā diyā

jis din se maiñ ḳhulūs ke sāñche meñ Dhal gayā

kyoñ hañste hañste aañkh se aañsū nikal paḌe

kyoñ yak-ba-yak bahār kā mausam badal gayā

gauhar jise samajhte the sab log shahr meñ

parkhā gayā use to vo patthar nikal gayā

aa.ī thī ban ke aag mire vāste bahār

jis phuul ko bhī maiñ ne chhuā haath jal gayā

sach boltā nahīñ hai koī shaḳhs āj-kal

dekhā jo merā hashr zamāna sañbhal gayā

rakhte the phūñk phūñk ke jab apnā har qadam

raste meñ kaise paañv tumhārā phisal gayā

ummīd jin se amn kī bārish kī thī 'qamar'

un bādaloñ ko vaqt kā sūraj nigal gayā

dil par nigah-e-naz ka jadu jo chal gaya

wo sarhad-e-shuur se aage nikal gaya

chhat par meri utarti nahin dhup aaj-kal

suraj mere KHilaf koi chaal chal gaya

logon ne mujh ko apni nazar se gira diya

jis din se main KHulus ke sanche mein Dhal gaya

kyon hanste hanste aankh se aansu nikal paDe

kyon yak-ba-yak bahaar ka mausam badal gaya

gauhar jise samajhte the sab log shahr mein

parkha gaya use to wo patthar nikal gaya

aai thi ban ke aag mere waste bahaar

jis phul ko bhi main ne chhua hath jal gaya

sach bolta nahin hai koi shaKHs aaj-kal

dekha jo mera hashr zamana sanbhal gaya

rakhte the phunk phunk ke jab apna har qadam

raste mein kaise panw tumhaara phisal gaya

ummid jin se amn ki barish ki thi 'qamar'

un baadalon ko waqt ka suraj nigal gaya