dil par wafa ka bojh uThate rahe hain hum

dil par vafā kā bojh uThāte rahe haiñ ham

apnā har imtiyāz miTāte rahe haiñ ham

muñh par jo ye jale hue dāman kī raakh hai

sho.aloñ meñ zindagī ke nahāte rahe haiñ ham

itnā na khul sakā ki havā kis taraf kī hai

saare jahāñ kī ḳhaak uḌāte rahe haiñ ham

āñkhoñ se dil tak ek jahān-e-sukūt hai

sunte haiñ is dayār se jaate rahe haiñ ham

terā ḳhayāl māne-e-arz-e-hunar huā

kis kis tarah se jī ko jalāte rahe haiñ ham

kis kī sadā sunī thī ki chup lag ga.ī 'shahāb'

sātoñ suroñ kā bhed gañvāte rahe haiñ ham

dil par wafa ka bojh uThate rahe hain hum

apna har imtiyaz miTate rahe hain hum

munh par jo ye jale hue daman ki rakh hai

shoalon mein zindagi ke nahate rahe hain hum

itna na khul saka ki hawa kis taraf ki hai

sare jahan ki KHak uDate rahe hain hum

aankhon se dil tak ek jahan-e-sukut hai

sunte hain is dayar se jate rahe hain hum

tera KHayal mane-e-arz-e-hunar hua

kis kis tarah se ji ko jalate rahe hain hum

kis ki sada suni thi ki chup lag gai 'shahab'

saton suron ka bhed ganwate rahe hain hum