dil pe jaur-o-sitam garan na hue

dil pe jaur-o-sitam garāñ na hue

kaise kah duuñ vo mehrbāñ na hue

haa.e yādoñ ke vo nuqūsh-e-hasīñ

miT ga.e aur be-nishāñ na hue

dekhne vaale sūrat-e-shabnam

sūrat-e-bahr-e-be-karāñ na hue

sochtā huuñ vo ashk kyā hoñge

jo abhī zeb-e-dāstāñ na hue

ġham to ye hai ki gulsitāñ meñ sab

phuul kāñToñ ke darmiyāñ na hue

mere sheroñ se zindagī ke raaz

kuchh hue kuchh abhī ayaañ na hue

log kuchh bhī kaheñ magar ham log

rā.egāñ ho ke rā.egāñ na hue

hausla dekh umr-bhar ham log

zindagī tujh se bad-gumāñ na hue

sāneha hai ki un kī mahfil meñ

aaj 'nashtar' hī naġhma-ḳhvāñ na hue

dil pe jaur-o-sitam garan na hue

kaise kah dun wo mehrban na hue

hae yaadon ke wo nuqush-e-hasin

miT gae aur be-nishan na hue

dekhne wale surat-e-shabnam

surat-e-bahr-e-be-karan na hue

sochta hun wo ashk kya honge

jo abhi zeb-e-dastan na hue

gham to ye hai ki gulsitan mein sab

phul kanTon ke darmiyan na hue

mere sheron se zindagi ke raaz

kuchh hue kuchh abhi ayan na hue

log kuchh bhi kahen magar hum log

raegan ho ke raegan na hue

hausla dekh umr-bhar hum log

zindagi tujh se bad-guman na hue

saneha hai ki un ki mahfil mein

aaj 'nashtar' hi naghma-KHwan na hue