دل پہ کیسا غبار رہتا ہے

دل پہ کیسا غبار رہتا ہے

ہر گھڑی بیقرار رہتا ہے

چشم مے بار کے تصور سے

ہلکا ہلکا خمار رہتا ہے

ساتھ ان کا نہیں نصیب مرا

پھر بھی کیوں انتظار رہتا ہے

اپنے حصے سے بڑھ کے پا کر بھی

خواہشوں کا شمار رہتا ہے

مسکرا دیں تو سارے گلشن میں

موسم دل بہار رہتا ہے

آسماں ان کے ایک آنسو پر

مدتوں اشک بار رہتا ہے

سامنے جن کے لب نہیں کھلتے

دل انہی پر نثار رہتا ہے

جسم لاغر ہو چاہے جتنا بھی

پھر بھی جوبن پہ پیار رہتا ہے

جیت پاتا ہے راہ وار مگر

سرخ رو شہسوار رہتا ہے

پھول رہتا ہے پھول ہی ہر جا

خار ہر جا ہی خار رہتا ہے

ساتھ پیاروں کا ہو اگر شاہینؔ

زندگی سے بھی پیار رہتا ہے