dil pe kuchh aur zaKHm khane de

dil pe kuchh aur zaḳhm khāne de

kuchh mujhe aur muskurāne de

dekh sūraj nikalne vaalā hai

ho ga.ī sub.h mujh ko jaane de

jang dushman se ab zarūrī hai

teġh apnī mujhe uThāne de

qasr apne buland kar lekin

be-zamīnoñ ko bhī Thikāne de

rakh na yuuñ band saare darvāze

ḳhāna-e-dil meñ us ko aane de

ye luTāne se kam nahīñ hotī

daulat-e-harf hai luTāne de

ek chhoTī sī chhat hameñ bhī kahīñ

kahīñ ham ko bhī sar chhupāne de

har taraf tere shahr haiñ ābād

bastiyāñ kuchh hameñ basāne de

chheḌ mat un purāne qissoñ ko

baat bigḌegī chhoḌ jaane de

vo mirā hī rahegā log use

varġhalāte haiñ varġhalāne de

tesha Thahrā hai shart-e-‘ishq agar

haath mujh ko bhī āzmāne de

sab ko ā.indagāñ kī de sauġhāt

mujh ko guzre hue zamāne de

naql uslūb kī jo karte haiñ

un ko mazmūn bhī churāne de

she'r kī saltanat rahe daa.im

lafz-o-mā'nī ke vo ḳhazāne de

dil pe kuchh aur zaKHm khane de

kuchh mujhe aur muskurane de

dekh suraj nikalne wala hai

ho gai subh mujh ko jaane de

jang dushman se ab zaruri hai

tegh apni mujhe uThane de

qasr apne buland kar lekin

be-zaminon ko bhi Thikane de

rakh na yun band sare darwaze

KHana-e-dil mein us ko aane de

ye luTane se kam nahin hoti

daulat-e-harf hai luTane de

ek chhoTi si chhat hamein bhi kahin

kahin hum ko bhi sar chhupane de

har taraf tere shahr hain aabaad

bastiyan kuchh hamein basane de

chheD mat un purane qisson ko

baat bigDegi chhoD jaane de

wo mera hi rahega log use

warghalate hain warghalane de

tesha Thahra hai shart-e-‘ishq agar

hath mujh ko bhi aazmane de

sab ko aaindagan ki de saughat

mujh ko guzre hue zamane de

naql uslub ki jo karte hain

un ko mazmun bhi churane de

she'r ki saltanat rahe daim

lafz-o-ma'ni ke wo KHazane de