dil pe uski hukmrani dekhiye kab tak rahe

dil pe us kī hukmrānī dekhiye kab tak rahe

ye karam ye mehrbānī dekhiye kab tak rahe

un kā ġham un kī mohabbat ġhair-fānī hī sahī

rishta-e-duniyā-e-fānī dekhiye kab tak rahe

shādmāñ haiñ aaj gulshan meñ bahār-e-nau se ham

ab ye daur-e-shādmānī dekhiye kab tak rahe

dil sukūñ-sāmāniyoñ meñ bhī sukūñ paatā nahīñ

ye tazād-e-zindagānī dekhiye kab tak rahe

ishq meñ nām-e-ḳhushī se Dūbne lagtā hai dil

ġham barā-e-shādmānī dekhiye kab tak rahe

mujh ko us par hai bharosa aur us ko ġhair par

ye yaqīñ ye bad-gumānī dekhiye kab tak rahe

apne har aañsū meñ 'shādāñ' ik kahānī hai nihāñ

be-haqīqat har kahānī dekhiye kab tak rahe

dil pe us ki hukmrani dekhiye kab tak rahe

ye karam ye mehrbani dekhiye kab tak rahe

un ka gham un ki mohabbat ghair-fani hi sahi

rishta-e-duniya-e-fani dekhiye kab tak rahe

shadman hain aaj gulshan mein bahaar-e-nau se hum

ab ye daur-e-shadmani dekhiye kab tak rahe

dil sukun-samaniyon mein bhi sukun pata nahin

ye tazad-e-zindagani dekhiye kab tak rahe

ishq mein nam-e-KHushi se Dubne lagta hai dil

gham bara-e-shadmani dekhiye kab tak rahe

mujh ko us par hai bharosa aur us ko ghair par

ye yaqin ye bad-gumani dekhiye kab tak rahe

apne har aansu mein 'shadan' ek kahani hai nihan

be-haqiqat har kahani dekhiye kab tak rahe