dil sair kuchh itna ho paimana nazar aae

dil sair kuchh itnā ho paimāna nazar aa.e

jis samt nazar jaa.e mai-ḳhāna nazar aa.e

lāzim hai ki duniyā se begāna nazar aa.e

vo hosh kā paikar jo dīvāna nazar aa.e

sūrat kā tirī aalam dīvāna nazar aa.e

gar aañkh ko parde kā dhokā na nazar aa.e

achchhā hai jo phūloñ ko kāñTā na nazar aa.e

kyoñ ḳhuld ke bandoñ ko vīrāna nazar aa.e

bantā hai koī apnā is yaas kī zulmat meñ

jab ġham ke sivā koī yārāna nazar aa.e

ai sāqī-e-ḳhuddārī vo jaam pilā jis se

zāhid kī haqīqat bhī rindāna nazar aa.e

māhaul-e-pareshāñ meñ saada sī tamanna hai

har ā.īna ab rū-e-jānāna nazar aa.e

gar 'shād' rahā chāhe us chashm kā hāmil ban

tanvīr-e-haram jis meñ but-ḳhāna nazar aa.e

dil sair kuchh itna ho paimana nazar aae

jis samt nazar jae mai-KHana nazar aae

lazim hai ki duniya se begana nazar aae

wo hosh ka paikar jo diwana nazar aae

surat ka teri aalam diwana nazar aae

gar aankh ko parde ka dhoka na nazar aae

achchha hai jo phulon ko kanTa na nazar aae

kyon KHuld ke bandon ko virana nazar aae

banta hai koi apna is yas ki zulmat mein

jab gham ke siwa koi yarana nazar aae

ai saqi-e-KHuddari wo jam pila jis se

zahid ki haqiqat bhi rindana nazar aae

mahaul-e-pareshan mein sada si tamanna hai

har aaina ab ru-e-jaanana nazar aae

gar 'shad' raha chahe us chashm ka hamil ban

tanwir-e-haram jis mein but-KHana nazar aae