dil saKHt kar ke chalna aahon ko tham chalna

dil saḳht kar ke chalnā aahoñ ko thaam chalnā

bār-e-garāñ uThānā par be-lagām chalnā

jo rāsta kaThin ho to ḳhush-ḳhirām chalnā

jo rah-guzar ho lambī to tez-gām chalnā

kuchh log chal rahe haiñ shāyad tumhāre pīchhe

tum un ke naam chalnā tum apne naam chalnā

kuchh raushnī baḌhānā kuchh tīrgī chhupānā

kuchh mash'aleñ jalā ke kuchh bhar ke jaam chalnā

jab ham-safar hoñ dushman jab rahnumā ho barham

ruknā nahīñ tum un ko de kar salām chalnā

ye shams aur qamar to haiñ vaqt se hī chalte

tum qabl-e-sub.h chalnā tum bā’d-e-shām chalnā

lutf-e-safar ko chhoḌo raḳht-e-safar ko phūñko

'azm-e-safar kā kar ke bas ehtimām chalnā

'zarra' yahāñ pe manzil kis ko huī hai hāsil

tum be-maqām chalnā tum be-qayām chalnā

dil saKHt kar ke chalna aahon ko tham chalna

bar-e-garan uThana par be-lagam chalna

jo rasta kaThin ho to KHush-KHiram chalna

jo rah-guzar ho lambi to tez-gam chalna

kuchh log chal rahe hain shayad tumhaare pichhe

tum un ke nam chalna tum apne nam chalna

kuchh raushni baDhana kuchh tirgi chhupana

kuchh mash'alen jala ke kuchh bhar ke jam chalna

jab ham-safar hon dushman jab rahnuma ho barham

rukna nahin tum un ko de kar salam chalna

ye shams aur qamar to hain waqt se hi chalte

tum qabl-e-subh chalna tum ba’d-e-sham chalna

lutf-e-safar ko chhoDo raKHt-e-safar ko phunko

'azm-e-safar ka kar ke bas ehtimam chalna

'zarra' yahan pe manzil kis ko hui hai hasil

tum be-maqam chalna tum be-qayam chalna