dil se agar na hoga to hoga nigah se

dil se agar na hogā to hogā nigāh se

insān huuñ maiñ bach na sakūñgā gunāh se

yūsuf nikal to aa.e ho zindān-e-rāh se

tum kaise bach sakoge zuleḳhā kī chaah se

kaisī hai duniyā hote haiñ kyā duniyā-dār log

pūchho kisī faqīr se yā bādshāh se

jis kī hadoñ meñ jalte haiñ jibrīl ke bhī par

maiñ ho ke aa gayā huuñ usī jalva-gāh se

shā.ir kī qadr hai na koī shā.erī kā mol

miltā hai shā.erī kā sila vaah vaah se

apnī nazar kā husn hai aur kuchh nahīñ 'sirāj'

jis ko hasīn chāho banā do nigāh se

dil se agar na hoga to hoga nigah se

insan hun main bach na sakunga gunah se

yusuf nikal to aae ho zindan-e-rah se

tum kaise bach sakoge zuleKHa ki chah se

kaisi hai duniya hote hain kya duniya-dar log

puchho kisi faqir se ya baadshah se

jis ki hadon mein jalte hain jibril ke bhi par

main ho ke aa gaya hun usi jalwa-gah se

shair ki qadr hai na koi shaeri ka mol

milta hai shaeri ka sila wah wah se

apni nazar ka husn hai aur kuchh nahin 'siraj'

jis ko hasin chaho bana do nigah se