dil se be-chaargi-e-ishq zaban tak pahunchi

dil se be-chārgī-e-ishq zabāñ tak pahuñchī

haa.e majbūri-e-hālāt kahāñ tak pahuñchī

merī rūdād-e-alam un kī zabāñ tak pahuñchī

dil se niklī huī āvāz kahāñ tak pahuñchī

apnā to kaam hai paiġhām-e-mohabbat denā

ye nahīñ dekhte āvāz kahāñ tak pahuñchī

maiñ ḳhudā jaane mohabbat meñ kahāñ tak pahuñchā

aur duniyā mire qadmoñ ke nishāñ tak pahuñchī

koī afsāna nahīñ bantā haqīqat ke baġhair

dil se niklī to koī baat zabāñ tak pahuñchī

koī mafhūm na samjhā mire afsāne kā

sirf logoñ kī nazar husn-e-bayāñ tak pahuñchī

kyā kaheñge tujhe arbāb-e-mohabbat 'raunaq'

ishq kī baat agar lafz-o-bayāñ tak pahuñchī

dil se be-chaargi-e-ishq zaban tak pahunchi

hae majburi-e-haalat kahan tak pahunchi

meri rudad-e-alam un ki zaban tak pahunchi

dil se nikli hui aawaz kahan tak pahunchi

apna to kaam hai paigham-e-mohabbat dena

ye nahin dekhte aawaz kahan tak pahunchi

main KHuda jaane mohabbat mein kahan tak pahuncha

aur duniya mere qadmon ke nishan tak pahunchi

koi afsana nahin banta haqiqat ke baghair

dil se nikli to koi baat zaban tak pahunchi

koi mafhum na samjha mere afsane ka

sirf logon ki nazar husn-e-bayan tak pahunchi

kya kahenge tujhe arbab-e-mohabbat 'raunaq'

ishq ki baat agar lafz-o-bayan tak pahunchi