dil se dhaDkan KHun se azm-e-safar le jaega

dil se dhaḌkan ḳhuun se azm-e-safar le jā.egā

vaqt ik din chhīn kar saare hunar le jā.egā

haañ duā māñgī thī lekin ye to sochā bhī na thā

mausam-e-barsāt sab dīvār-o-dar le jā.egā

aaj is titlī ko in phūloñ pe uḌne dījiye

kal koī jhoñkā havā kā is ke par le jā.egā

tū kisī andhe kuñ.eñ meñ jaa.e to ye jaan le

saath saath apne ye merī bhī nazar le jā.egā

dūsroñ ke ghar meñ patthar pheñkne vaale ye soch

tū bachā kar kis tarah shīshe kā ghar le jā.egā

shahr kī saḌkoñ pe mere saath mat niklo abhī

jo bhī dekhegā uḌā kar ye ḳhabar le jā.egā

sar-bulandī jis kā mansab hai vo jhuk saktā nahīñ

dast-e-qātil us kā ḳhud neze pe sar le jā.egā

dil se dhaDkan KHun se azm-e-safar le jaega

waqt ek din chhin kar sare hunar le jaega

han dua mangi thi lekin ye to socha bhi na tha

mausam-e-barsat sab diwar-o-dar le jaega

aaj is titli ko in phulon pe uDne dijiye

kal koi jhonka hawa ka is ke par le jaega

tu kisi andhe kunen mein jae to ye jaan le

sath sath apne ye meri bhi nazar le jaega

dusron ke ghar mein patthar phenkne wale ye soch

tu bacha kar kis tarah shishe ka ghar le jaega

shahr ki saDkon pe mere sath mat niklo abhi

jo bhi dekhega uDa kar ye KHabar le jaega

sar-bulandi jis ka mansab hai wo jhuk sakta nahin

dast-e-qatil us ka KHud neze pe sar le jaega