dil se dil ka rasta bhi aazmana chahiye

dil se dil kā rāsta bhī āzmānā chāhiye

ruuTh jaa.e koī to us ko manānā chāhiye

baad muddat ke vo mil jaa.e kisī mahfil meñ to

haal apnā bhī use phir kuchh sunānā chāhiye

zindagī jab chheḌ detī hai ġhalat dhun koī bhī

bahr yā phir qāfiya us meñ lagānā chāhiye

yuuñ to āñdhī meñ diyā raushan rahe mumkin nahīñ

kuchh mohabbat ke charāġhoñ ko jalānā chāhiye

vo tajāhul hai jo mujh se is tarah mahfil meñ ab

us kī is harakat ko chupke se chhupānā chāhiye

chhoḌ kar chāhe chalā jaa.e vo kuchh bole binā

apne hisse kī vafā ko bas nibhānā chāhiye

roz qāsid dekhtā rahtā huuñ qāsid kī Dagar

koī us kā bhī javābī ḳhat to aanā chāhiye

dil se dil ka rasta bhi aazmana chahiye

ruTh jae koi to us ko manana chahiye

baad muddat ke wo mil jae kisi mahfil mein to

haal apna bhi use phir kuchh sunana chahiye

zindagi jab chheD deti hai ghalat dhun koi bhi

bahr ya phir qafiya us mein lagana chahiye

yun to aandhi mein diya raushan rahe mumkin nahin

kuchh mohabbat ke charaghon ko jalana chahiye

wo tajahul hai jo mujh se is tarah mahfil mein ab

us ki is harakat ko chupke se chhupana chahiye

chhoD kar chahe chala jae wo kuchh bole bina

apne hisse ki wafa ko bas nibhana chahiye

roz qasid dekhta rahta hun qasid ki Dagar

koi us ka bhi jawabi KHat to aana chahiye