dil se dil ke waste paigham kaise aa gaya

dil se dil ke vāste paiġhām kaise aa gayā

mere hoñToñ par tumhārā naam kaise aa gayā

un kī mahfil meñ hamārā naam kaise aa gayā

aaj zikr-e-gardish-e-ayyām kaise aa gayā

dil sī shai ne kaise rasm-e-ārzū kar lī qubūl

tā.ir-e-aflāk zer-e-dām kaise aa gayā

log kahte haiñ masarrat zindagī kā naam hai

phir ye mujh par ziist kā ilzām kaise aa gayā

ishrat-e-ahd-e-guzashta kis tarah yaad aa ga.ī

haath meñ ā.īna-e-ayyām kaise aa gayā

shīsha-e-dil bas-ki nāzuk ishq kī mai tund-o-tez

tum pe ilzām-e-shikast-e-jām kaise aa gayā

fikr ke bādal jabīn-e-husn par 'ehsās' kyuuñ

ye sahar ke vaqt zikr-e-shām kaise aa gayā

dil se dil ke waste paigham kaise aa gaya

mere honTon par tumhaara nam kaise aa gaya

un ki mahfil mein hamara nam kaise aa gaya

aaj zikr-e-gardish-e-ayyam kaise aa gaya

dil si shai ne kaise rasm-e-arzu kar li qubul

tair-e-aflak zer-e-dam kaise aa gaya

log kahte hain masarrat zindagi ka nam hai

phir ye mujh par zist ka ilzam kaise aa gaya

ishrat-e-ahd-e-guzashta kis tarah yaad aa gai

hath mein aaina-e-ayyam kaise aa gaya

shisha-e-dil bas-ki nazuk ishq ki mai tund-o-tez

tum pe ilzam-e-shikast-e-jam kaise aa gaya

fikr ke baadal jabin-e-husn par 'ehsas' kyun

ye sahar ke waqt zikr-e-sham kaise aa gaya