dil se kisi ki yaad bhulane chala tha main

dil se kisī kī yaad bhulāne chalā thā maiñ

jaltā huā charāġh bujhāne chalā thā maiñ

sharminda huuñ ye kah ke ulaT dījiye naqāb

mahshar se pahle hashr uThāne chalā thā maiñ

yā-rab junūn-e-ishq ne pahuñchā diyā kahāñ

kāñToñ ko bhī gale se lagāne chalā thā maiñ

qismat se aise daur bhī guzre haiñ bārhā

apne chaman ko aag lagāne chalā thā maiñ

ġham aur itnā ġham ki sukūñ naam ko nahīñ

aur apne dil ko us pe hañsāne chalā thā maiñ

allāh mere kufr-e-mohabbat kī ḳhair ho

but ke qadam pe sar ko jhukāne chalā thā maiñ

bijlī chamak ke merī nazar se guzar ga.ī

'anvar' jab āshiyāna banāne chalā thā maiñ

dil se kisi ki yaad bhulane chala tha main

jalta hua charagh bujhane chala tha main

sharminda hun ye kah ke ulaT dijiye naqab

mahshar se pahle hashr uThane chala tha main

ya-rab junun-e-ishq ne pahuncha diya kahan

kanTon ko bhi gale se lagane chala tha main

qismat se aise daur bhi guzre hain barha

apne chaman ko aag lagane chala tha main

gham aur itna gham ki sukun nam ko nahin

aur apne dil ko us pe hansane chala tha main

allah mere kufr-e-mohabbat ki KHair ho

but ke qadam pe sar ko jhukane chala tha main

bijli chamak ke meri nazar se guzar gai

'anwar' jab aashiyana banane chala tha main