dil se puchho kya hua tha aur kyun KHamosh tha

dil se pūchho kyā huā thā aur kyuuñ ḳhāmosh thā

aañkh mahv-e-dīd thī itnā mujhe bas hosh thā

vo bhī kyā tāsīr thī jis ne hilā.e sab ke dil

kyā batā.ūñ vo mirā hī nāla-e-pur-josh thā

mahfil-e-sāqī meñ thā kuchh aur hī mastoñ kā rang

koī sāġhar DhūñDhtā thā aur koī behosh thā

kyā 'ajab hai jā.eza le mai-parastoñ kā koī

yaad rakhnā sāqiyā mujh sā bhī ik mai-nosh thā

kyā samajh saktā thā koī tere dīvāne kī chup

jab kisī ne us se kuchh pūchhā to bas ḳhāmosh thā

be-ḳhudī se nashsha-e-jām-e-ḳhudī utrā to phir

ek hī sāġhar milā aisā ki maiñ mad.hosh thā

ik hamīñ ko sāqiyā pūchhā na tū ne daur maiñ

varna mai-ḳhāne meñ tere shor noshā-nosh thā

kis qadar thā ishtiyāq-e-manzil-e-maqsūd use

marne vaale kā janāza aaj doshā-dosh thā

zindagī-bhar ke gunāhoñ se ye thī sharm ai ajal

tārik-e-hastī yahāñ se jab chalā rū-posh thā

ġhunche kyuuñ ḳhāmosh aa.e gulshan-e-hastī meñ 'shauq'

mausam-e-gul se magar ḳhauf-e-ḳhizāñ ham-dosh thā

dil se puchho kya hua tha aur kyun KHamosh tha

aankh mahw-e-did thi itna mujhe bas hosh tha

wo bhi kya tasir thi jis ne hilae sab ke dil

kya bataun wo mera hi nala-e-pur-josh tha

mahfil-e-saqi mein tha kuchh aur hi maston ka rang

koi saghar DhunDhta tha aur koi behosh tha

kya 'ajab hai jaeza le mai-paraston ka koi

yaad rakhna saqiya mujh sa bhi ek mai-nosh tha

kya samajh sakta tha koi tere diwane ki chup

jab kisi ne us se kuchh puchha to bas KHamosh tha

be-KHudi se nashsha-e-jam-e-KHudi utra to phir

ek hi saghar mila aisa ki main madhosh tha

ek hamin ko saqiya puchha na tu ne daur main

warna mai-KHane mein tere shor nosha-nosh tha

kis qadar tha ishtiyaq-e-manzil-e-maqsud use

marne wale ka janaza aaj dosha-dosh tha

zindagi-bhar ke gunahon se ye thi sharm ai ajal

tarik-e-hasti yahan se jab chala ru-posh tha

ghunche kyun KHamosh aae gulshan-e-hasti mein 'shauq'

mausam-e-gul se magar KHauf-e-KHizan ham-dosh tha