dil se ye kah raha hun zara aur dekh le

dil se ye kah rahā huuñ zarā aur dekh le

sau baar us ko dekh chukā aur dekh le

us ko ḳhabar huī to badal jā.egā vo rañg

ehsās tak na us ko dilā aur dekh le

sahrā meñ kyā dharā hai abhī shahr ko na chhoḌ

kuchh roz dostoñ kī vafā aur dekh le

mausam kā e'tibār nahīñ bādbāñ na khol

kuchh der sāhiloñ kī havā aur dekh le

sahrā-e-ārzū hai qadam dekh-bhāl kar

kāñToñ kī samt ābla-pā aur dekh le

hotā koī to paañv kī aahaT se chauñktā

jañgal hai kar ke ek sadā aur dekh le

dil bhī to ik dayār hai raushan harā-bharā

āñkhoñ kā ye charāġh bujhā aur dekh le

mumkin hai ek lamhe kī mehmān ho bahār

phūloñ kī tāzgī pe na jā aur dekh le

yuuñ kis tarah batā.ūñ ki kyā mere paas hai

tū bhī to koī rañg dikhā aur dekh le

dekhī thī ik jhalak ki uḌe rañg har taraf

koī pukārtā hī rahā aur dekh le

'shahzād' zindagī ke jhamele hazār haiñ

duniyā nahīñ pasand to aa aur dekh le

dil se ye kah raha hun zara aur dekh le

sau bar us ko dekh chuka aur dekh le

us ko KHabar hui to badal jaega wo rang

ehsas tak na us ko dila aur dekh le

sahra mein kya dhara hai abhi shahr ko na chhoD

kuchh roz doston ki wafa aur dekh le

mausam ka e'tibar nahin baadban na khol

kuchh der sahilon ki hawa aur dekh le

sahra-e-arzu hai qadam dekh-bhaal kar

kanTon ki samt aabla-pa aur dekh le

hota koi to panw ki aahaT se chaunkta

jangal hai kar ke ek sada aur dekh le

dil bhi to ek dayar hai raushan hara-bhara

aankhon ka ye charagh bujha aur dekh le

mumkin hai ek lamhe ki mehman ho bahaar

phulon ki tazgi pe na ja aur dekh le

yun kis tarah bataun ki kya mere pas hai

tu bhi to koi rang dikha aur dekh le

dekhi thi ek jhalak ki uDe rang har taraf

koi pukarta hi raha aur dekh le

'shahzad' zindagi ke jhamele hazar hain

duniya nahin pasand to aa aur dekh le