dil shad nahin karte aabaad nahin karte

dil shaad nahīñ karte ābād nahīñ karte

mahsūs ye hotā hai vo yaad nahīñ karte

nāshād zamāne ke dil shaad nahīñ karte

kam-aql parindoñ ko āzād nahīñ karte

mohtāj-e-karam aksar rahte haiñ ġharīboñ ke

jo log ġharīboñ kī imdād nahīñ karte

kuchh log shikāyat ko haq apnā samajhte haiñ

kuchh log kabhī tum se fariyād nahīñ karte

ham apne irādoñ meñ rakhte haiñ tavānā.ī

ham daad ke tālib ko bedād nahīñ karte

jo aap kī niyyat kā kuchh ilm hameñ hotā

ham apnī mohabbat ko barbād nahīñ karte

is daur-e-siyāsat meñ 'mahmūd' qayāmat hai

ahbāb jo karte haiñ jallād nahīñ karte

dil shad nahin karte aabaad nahin karte

mahsus ye hota hai wo yaad nahin karte

nashad zamane ke dil shad nahin karte

kam-aql parindon ko aazad nahin karte

mohtaj-e-karam aksar rahte hain gharibon ke

jo log gharibon ki imdad nahin karte

kuchh log shikayat ko haq apna samajhte hain

kuchh log kabhi tum se fariyaad nahin karte

hum apne iradon mein rakhte hain tawanai

hum dad ke talib ko bedad nahin karte

jo aap ki niyyat ka kuchh ilm hamein hota

hum apni mohabbat ko barbaad nahin karte

is daur-e-siyasat mein 'mahmud' qayamat hai

ahbab jo karte hain jallad nahin karte