dil-shikan subh lage sham dil-azar lage

dil-shikan sub.h lage shaam dil-āzār lage

ab safīna mirā is paar na us paar lage

bazm-e-qātil kī tarah husn kī sarkār lage

yuuñ chale baat kī chaltī huī talvār lage

be-sahārā tire vā'doñ kā mahal hai varna

ḳhūbsūrat to bahut ret kī dīvār lage

qaum ke dard se ab un ko sarokār nahīñ

ḳhūn-e-insāñ kī numā.ish ho ki bāzār lage

thā burā vaqt jab un kā to sañbhālā ham ne

din phire ab to hamīñ un ko gunahgār lage

silsila shor-e-salāsil kā yahāñ tak pahuñchā

dil bhī dhaḌke hai to zanjīr kī jhankār lage

ab ke ye mauj-e-balā dekhiye le jaa.e kahāñ

is ke pahle to kināre se ka.ī baar lage

pī ke har-dam jo rahe mast vahī mai-kash hai

rind vo kyā hai jo mausam kā gunahgār lage

yuuñ bhī hotā hai ilāj-e-ġham-e-insāñ ki 'azīz'

naam kā naam ho bīmār kā bīmār lage

dil-shikan subh lage sham dil-azar lage

ab safina mera is par na us par lage

bazm-e-qatil ki tarah husn ki sarkar lage

yun chale baat ki chalti hui talwar lage

be-sahaara tere wa'don ka mahal hai warna

KHubsurat to bahut ret ki diwar lage

qaum ke dard se ab un ko sarokar nahin

KHun-e-insan ki numaish ho ki bazar lage

tha bura waqt jab un ka to sanbhaala hum ne

din phire ab to hamin un ko gunahgar lage

silsila shor-e-salasil ka yahan tak pahuncha

dil bhi dhaDke hai to zanjir ki jhankar lage

ab ke ye mauj-e-bala dekhiye le jae kahan

is ke pahle to kinare se kai bar lage

pi ke har-dam jo rahe mast wahi mai-kash hai

rind wo kya hai jo mausam ka gunahgar lage

yun bhi hota hai ilaj-e-gham-e-insan ki 'aziz'

nam ka nam ho bimar ka bimar lage