dil sikha lega agar jaur-o-jafa yaad nahin

dil sikhā legā agar jaur-o-jafā yaad nahīñ

ham banā leñge agar tum sitam-ījād nahīñ

naala kal kā sā nahīñ kal kī sī fariyād nahīñ

bulbul-e-bāġh ko phir aaj sabaq yaad nahīñ

kyā kahūñ naza.a meñ kyoñ shikva-e-bedād nahīñ

dam pe yuuñ aa ke banī fursat-e-fariyād nahīñ

yaas ai shauq-e-asīrī chaman ābād nahīñ

par nikalte haiñ yahāñ aur kahīñ sayyād nahīñ

kyoñ dam-e-hashr bhī dil shākī-e-bedād nahīñ

kuchh tirī chaal to ai ġhairat-e-shamshād nahīñ

vahī naale to haiñ taaza koī fariyād nahīñ

uTh khaḌā ho bhī falak kuchh na.ī uftād nahīñ

silsila TūTnā achchhā dil-e-nāshād nahīñ

dam jagah se na uThe jis meñ ki fariyād nahīñ

log kahne ko tujhe rashk-e-parī kahte haiñ

ādamiyyat to ye hī hai ki parī-zād nahīñ

saikḌoñ ko nigah-e-nāz ne gardan maarā

maiñ na mānūñgā ki āñkheñ tirī jallād nahīñ

be-asar ashk se achchhā hai jo āñkheñ phūTeñ

nā-ḳhalaf se to ye behtar hai ki aulād nahīñ

apne par apnī hī minqār se noche maiñ ne

kyā karūñ tāb-e-farāmoshī-e-sayyād nahīñ

dil-ḳharāshī se hai kyā koh-kanī ko nisbat

nāḳhun-e-ġham se fuzūñ taisha-e-farhād nahīñ

be-ḳhudī meñ na khulā kuchh ki ḳhudā.ī kyā hai

dekh kar but ko ye bhūle ki ḳhudā yaad nahīñ

qatl kā hukm to āñkhoñ ke ishāroñ meñ huā

kahiye kuchh aur to haq meñ mire irshād nahīñ

dil nahīñ muft mile kaise dahan kā bosa

ghar meñ kuchh maal nahīñ ġhair se imdād nahīñ

kyā asīrān-e-qafas raat ko chupke so.e

aaj kuchh shikva-e-be-ḳhvābī-e-sayyād nahīñ

duur se aatī haiñ farmā.isheñ kyoñ bahr-e-suḳhan

'sho.ala' 'ġhālib' nahīñ kuchh 'zauq' sā ustād nahīñ

dil sikha lega agar jaur-o-jafa yaad nahin

hum bana lenge agar tum sitam-ijad nahin

nala kal ka sa nahin kal ki si fariyaad nahin

bulbul-e-bagh ko phir aaj sabaq yaad nahin

kya kahun naza mein kyon shikwa-e-bedad nahin

dam pe yun aa ke bani fursat-e-fariyaad nahin

yas ai shauq-e-asiri chaman aabaad nahin

par nikalte hain yahan aur kahin sayyaad nahin

kyon dam-e-hashr bhi dil shaki-e-bedad nahin

kuchh teri chaal to ai ghairat-e-shamshad nahin

wahi nale to hain taza koi fariyaad nahin

uTh khaDa ho bhi falak kuchh nai uftad nahin

silsila TuTna achchha dil-e-nashad nahin

dam jagah se na uThe jis mein ki fariyaad nahin

log kahne ko tujhe rashk-e-pari kahte hain

aadamiyyat to ye hi hai ki pari-zad nahin

saikDon ko nigah-e-naz ne gardan mara

main na manunga ki aankhen teri jallad nahin

be-asar ashk se achchha hai jo aankhen phuTen

na-KHalaf se to ye behtar hai ki aulad nahin

apne par apni hi minqar se noche main ne

kya karun tab-e-faramoshi-e-sayyaad nahin

dil-KHarashi se hai kya koh-kani ko nisbat

naKHun-e-gham se fuzun taisha-e-farhad nahin

be-KHudi mein na khula kuchh ki KHudai kya hai

dekh kar but ko ye bhule ki KHuda yaad nahin

qatl ka hukm to aankhon ke ishaaron mein hua

kahiye kuchh aur to haq mein mere irshad nahin

dil nahin muft mile kaise dahan ka bosa

ghar mein kuchh mal nahin ghair se imdad nahin

kya asiran-e-qafas raat ko chupke soe

aaj kuchh shikwa-e-be-KHwabi-e-sayyaad nahin

dur se aati hain farmaishen kyon bahr-e-suKHan

'shoala' 'ghaalib' nahin kuchh 'zauq' sa ustad nahin