dil teri yaad mein har lamha taDapta bhi nahin

dil tirī yaad meñ har lamha taḌaptā bhī nahīñ

band ho jaa.e taḌapnā ye gavārā bhī nahīñ

vo nahīñ paas to ehsās-e-rifāqat hai sivā

ġham-e-tanhā.ī ke zindāñ meñ maiñ tanhā bhī nahīñ

dasht dīvānoñ se ābād hue jaate haiñ

ab to jāgīr kisī qais kī sahrā bhī nahīñ

sañg-e-dushnām baraste rahe har jānib se

saḳht-jāñ dil hī kuchh aisā thā ki TuuTā bhī nahīñ

kar to luuñ tark-e-tamannā kā irāda lekin

qahr ye hai vo fusūñ-gar sitam-ārā bhī nahīñ

rañg kyuuñ uḌ gayā gulshan ke havā-dāroñ kā

garm jhoñkā koī is raah se guzrā bhī nahīñ

sard hai marg-sifat misr-e-junūñ kā bāzār

ḳhvāb-e-yūsuf bhī nahīñ ḳhvāb-e-zuleḳhā bhī nahīñ

dil teri yaad mein har lamha taDapta bhi nahin

band ho jae taDapna ye gawara bhi nahin

wo nahin pas to ehsas-e-rifaqat hai siwa

gham-e-tanhai ke zindan mein main tanha bhi nahin

dasht diwanon se aabaad hue jate hain

ab to jagir kisi qais ki sahra bhi nahin

sang-e-dushnam baraste rahe har jaanib se

saKHt-jaan dil hi kuchh aisa tha ki TuTa bhi nahin

kar to lun tark-e-tamanna ka irada lekin

qahr ye hai wo fusun-gar sitam-ara bhi nahin

rang kyun uD gaya gulshan ke hawa-daron ka

garm jhonka koi is rah se guzra bhi nahin

sard hai marg-sifat misr-e-junun ka bazar

KHwab-e-yusuf bhi nahin KHwab-e-zuleKHa bhi nahin