dil to aaKHir dil hai dil ko etibar aa hi gaya

dil to āḳhir dil hai dil ko e'tibār aa hī gayā

laakh shikve hoñ unheñ dekhā to pyaar aa hī gayā

us nazar par ho masīhā kī masīhā.ī nisār

jis nazar se be-qarārī ko qarār aa hī gayā

un ke dam se mai-kade kī aur raunaq baḌh ga.ī

vo jo aa.e jhuum kar abr-e-bahār aa hī gayā

mar ke bhī sar se na saudā jā sakā is shauq kā

kū-e-jānāñ tak mirā uḌ kar ġhubār aa hī gayā

baḌh ga.ī had se mirī 'bechain' ab bechainiyāñ

kaam āḳhir merā ḳhūn-e-dil-fiġhār aa hī gayā

dil to aaKHir dil hai dil ko e'tibar aa hi gaya

lakh shikwe hon unhen dekha to pyar aa hi gaya

us nazar par ho masiha ki masihai nisar

jis nazar se be-qarari ko qarar aa hi gaya

un ke dam se mai-kade ki aur raunaq baDh gai

wo jo aae jhum kar abr-e-bahaar aa hi gaya

mar ke bhi sar se na sauda ja saka is shauq ka

ku-e-jaanan tak mera uD kar ghubar aa hi gaya

baDh gai had se meri 'bechain' ab bechainiyan

kaam aaKHir mera KHun-e-dil-fighaar aa hi gaya