dil to dil shart ye hai jaan bhi qurban karna

dil to dil shart ye hai jaan bhī qurbāñ karnā

kuchh hañsī-khel nahīñ aap kā armāñ karnā

mere vahshat ke vo andāz kahāñ un ko nasīb

phuul sīkheñ to abhī chāk-e-garebāñ karnā

aur kuchh un ko nahīñ ġhair ke qissoñ se ġharaz

kuchh na kuchh kah ke mire dil ko pareshāñ karnā

bujhne vaalā hai marīz-e-ġham-e-ulfat kā charāġh

dushmanoñ se koī kah de ki charāġhāñ karnā

āsmāñ ko hai chamakte hue tāroñ pe ġhurūr

tum zarā apnī jabīñ ko to pur-afshāñ karnā

ai dil-e-zār ye aaya nigah-e-nāz kā tiir

hausle se bhī sivā ḳhātir-e-mehmāñ karnā

sun rahā huuñ ki phir aane ko hai gulshan meñ bahār

tauq-e-zanjīr kā mere liye sāmāñ karnā

āfateñ kunj-e-qafas kī haiñ muqaddar meñ 'ziyā'

kab mayassar ho mujhe sair-e-gulistāñ karnā

dil to dil shart ye hai jaan bhi qurban karna

kuchh hansi-khel nahin aap ka arman karna

mere wahshat ke wo andaz kahan un ko nasib

phul sikhen to abhi chaak-e-gareban karna

aur kuchh un ko nahin ghair ke qisson se gharaz

kuchh na kuchh kah ke mere dil ko pareshan karna

bujhne wala hai mariz-e-gham-e-ulfat ka charagh

dushmanon se koi kah de ki charaghan karna

aasman ko hai chamakte hue taron pe ghurur

tum zara apni jabin ko to pur-afshan karna

ai dil-e-zar ye aaya nigah-e-naz ka tir

hausle se bhi siwa KHatir-e-mehman karna

sun raha hun ki phir aane ko hai gulshan mein bahaar

tauq-e-zanjir ka mere liye saman karna

aafaten kunj-e-qafas ki hain muqaddar mein 'ziya'

kab mayassar ho mujhe sair-e-gulistan karna