dil TuT chuka tar-e-nazar TuT raha hai

dil TuuT chukā tār-e-nazar TuuT rahā hai

qistoñ meñ musāfir kā safar TuuT rahā hai

har roz badaltā hai nayā rañg zamāna

har shaḳhs ba-andāz-e-digar TuuT rahā hai

tū ġhaur se dekhe to ye ma.alūm ho tujh ko

jo kuchh hai tire pesh-e-nazar TuuT rahā hai

kyā jāniye kyuuñ log tashaddud pe utar aa.e

dastār bachāte haiñ to sar TuuT rahā hai

manzil hai ki ojhal hai nigāhoñ se abhī tak

rasta hai ki tā-hadd-e-nazar TuuT rahā hai

jo vaar bhī kartā hai vo kaarī nahīñ hotā

qātil kā mire zo.am-e-hunar TuuT rahā hai

kuchh aise 'shafīq' ab ke hue vaqt se pāmāl

parvāz kā zāmin thā jo par TuuT rahā hai

dil TuT chuka tar-e-nazar TuT raha hai

qiston mein musafir ka safar TuT raha hai

har roz badalta hai naya rang zamana

har shaKHs ba-andaz-e-digar TuT raha hai

tu ghaur se dekhe to ye malum ho tujh ko

jo kuchh hai tere pesh-e-nazar TuT raha hai

kya jaaniye kyun log tashaddud pe utar aae

dastar bachate hain to sar TuT raha hai

manzil hai ki ojhal hai nigahon se abhi tak

rasta hai ki ta-hadd-e-nazar TuT raha hai

jo war bhi karta hai wo kari nahin hota

qatil ka mere zoam-e-hunar TuT raha hai

kuchh aise 'shafiq' ab ke hue waqt se pamal

parwaz ka zamin tha jo par TuT raha hai