dil unki yaad se jo bahalta chala gaya

dil un kī yaad se jo bahaltā chalā gayā

ġham aap apnī aag meñ jaltā chalā gayā

tū lā-makāñ hai to mirī manzil bhī be-nishāñ

tere liye chalā to maiñ chaltā chalā gayā

kāñTe jahāñ jahāñ pe mile rāh-e-'ishq meñ

dāman bachā bachā ke nikaltā chalā gayā

nākāmiyoñ se kam na huā hausla mirā

Thokar lagī to aur sañbhaltā chalā gayā

maujoñ ke ruḳh ko pher diyā maiñ ne bārhā

tūfāñ kā sar uThā to kuchaltā chalā gayā

ye jaan kar ki ġham hai tirī yaad kā sabab

maiñ har ḳhushī ko ġham se badaltā chalā gayā

ahl-e-zamāna gard ko merī na pā sake

har qāfile se duur nikaltā chalā gayā

ashyā haiñ 'barq' silsila-e-vahdat-ul-vajūd

sau sau tarah se naam badaltā chalā gayā

dil un ki yaad se jo bahalta chala gaya

gham aap apni aag mein jalta chala gaya

tu la-makan hai to meri manzil bhi be-nishan

tere liye chala to main chalta chala gaya

kanTe jahan jahan pe mile rah-e-'ishq mein

daman bacha bacha ke nikalta chala gaya

nakaamiyon se kam na hua hausla mera

Thokar lagi to aur sanbhalta chala gaya

maujon ke ruKH ko pher diya main ne barha

tufan ka sar uTha to kuchalta chala gaya

ye jaan kar ki gham hai teri yaad ka sabab

main har KHushi ko gham se badalta chala gaya

ahl-e-zamana gard ko meri na pa sake

har qafile se dur nikalta chala gaya

ashya hain 'barq' silsila-e-wahdat-ul-wajud

sau sau tarah se nam badalta chala gaya