dil us bewafa se mila chahta hai

dil us bevafā se milā chāhtā hai

mujhe bhī ye rusvā kiyā chāhtā hai

vo duzd-e-hinā ḳhūñ-bahā chāhtā hai

hamārā bhī ab ḳhuuñ bahā chāhtā hai

tamāshā kar ai gul mire dāġh-e-dil kā

agar sair-e-gulshan kiyā chāhtā hai

ye sargoshiyāñ kab haiñ illat se ḳhālī

adū kaan meñ kuchh bharā chāhtā hai

ḳhudā.ī meñ kyā daḳhl hai in butoñ ko

jo kuchh chāhtā hai ḳhudā chāhtā hai

lagā kar lahū apne dāman meñ gul bhī

shahīdoñ meñ tere milā chāhtā hai

ayādat ko aatā hai bālīñ pe mere

vo qātil masīhā banā chāhtā hai

tahayya kiyā kārvāñ ne adam kā

jaras koī dam meñ bajā chāhtā hai

zarā gosh-e-dil se suno haal us kā

'fidā' aap se kuchh kahā chāhtā hai

dil us bewafa se mila chahta hai

mujhe bhi ye ruswa kiya chahta hai

wo duzd-e-hina KHun-baha chahta hai

hamara bhi ab KHun baha chahta hai

tamasha kar ai gul mere dagh-e-dil ka

agar sair-e-gulshan kiya chahta hai

ye sargoshiyan kab hain illat se KHali

adu kan mein kuchh bhara chahta hai

KHudai mein kya daKHl hai in buton ko

jo kuchh chahta hai KHuda chahta hai

laga kar lahu apne daman mein gul bhi

shahidon mein tere mila chahta hai

ayaadat ko aata hai baalin pe mere

wo qatil masiha bana chahta hai

tahayya kiya karwan ne adam ka

jaras koi dam mein baja chahta hai

zara gosh-e-dil se suno haal us ka

'fida' aap se kuchh kaha chahta hai