dil us se laga jis se ruTha bhi nahin jata

dil us se lagā jis se rūThā bhī nahīñ jaatā

kaam us se paḌā jis ko chhoḌā bhī nahīñ jaatā

din raat taḌaptā huuñ ab jis kī judā.ī meñ

vo sāmne aa.e to dekhā bhī nahīñ jaatā

manzil pe pahuñchne kī ummīd bañdhe kaise

paañv bhī nahīñ uThte rasta bhī nahīñ jaatā

ye kaun sī bastī hai ye kaun sā mausam hai

sochā bhī nahīñ jaatā bolā bhī nahīñ jaatā

añgāroñ kī manzil meñ zanjīr-bapā haiñ ham

Thahrā bhī nahīñ jaatā bhāgā bhī nahīñ jaatā

is martaba chhā.ī hai kuchh aisī ghaTā jis se

khulnā bhī nahīñ hotā barsā bhī nahīñ jaatā

har haal meñ itne bhī be-bas na hue the ham

daldal bhī nahīñ lekin niklā bhī nahīñ jaatā

mar jaate the ġhairoñ ke kāñTā bhī jo chubhtā thā

ḳhud qatl hue lekin royā bhī nahīñ jaatā

kāfir hoñ jo hasrat ho jiine kī magar 'shohrat'

is haal meñ yāroñ ko chhoḌā bhī nahīñ jaatā

dil us se laga jis se ruTha bhi nahin jata

kaam us se paDa jis ko chhoDa bhi nahin jata

din raat taDapta hun ab jis ki judai mein

wo samne aae to dekha bhi nahin jata

manzil pe pahunchne ki ummid bandhe kaise

panw bhi nahin uThte rasta bhi nahin jata

ye kaun si basti hai ye kaun sa mausam hai

socha bhi nahin jata bola bhi nahin jata

angaron ki manzil mein zanjir-bapa hain hum

Thahra bhi nahin jata bhaga bhi nahin jata

is martaba chhai hai kuchh aisi ghaTa jis se

khulna bhi nahin hota barsa bhi nahin jata

har haal mein itne bhi be-bas na hue the hum

daldal bhi nahin lekin nikla bhi nahin jata

mar jate the ghairon ke kanTa bhi jo chubhta tha

KHud qatl hue lekin roya bhi nahin jata

kafir hon jo hasrat ho jine ki magar 'shohrat'

is haal mein yaron ko chhoDa bhi nahin jata