dil waqf-e-iztirab bahut der tak raha

dil vaqf-e-iztirāb bahut der tak rahā

dar-pesh ye 'azāb bahut der tak rahā

ik din use khurach ke kahīñ le ga.e ye log

āñkhoñ meñ rang-e-ḳhvāb bahut der tak rahā

dekhā jab us ne jhiil ke paanī meñ apnā 'aks

sho'la ba-sat.h-e-āb bahut der tak rahā

is vāste janāb ke message na mil sake

mausam yahāñ ḳharāb bahut der tak rahā

us ke dahan se ḳhaas mohabbat rahī mujhe

vo merā ham-lu’āb bahut der tak rahā

koī to us meñ baat thī har ek se alag

jo shaḳhs kāmyāb bahut der tak rahā

apnī zarā bhī aap safā.ī na de sake

auroñ kā ehtisāb bahut der tak rahā

dil waqf-e-iztirab bahut der tak raha

dar-pesh ye 'azab bahut der tak raha

ek din use khurach ke kahin le gae ye log

aankhon mein rang-e-KHwab bahut der tak raha

dekha jab us ne jhil ke pani mein apna 'aks

sho'la ba-sath-e-ab bahut der tak raha

is waste janab ke message na mil sake

mausam yahan KHarab bahut der tak raha

us ke dahan se KHas mohabbat rahi mujhe

wo mera ham-lu’ab bahut der tak raha

koi to us mein baat thi har ek se alag

jo shaKHs kaamyab bahut der tak raha

apni zara bhi aap safai na de sake

auron ka ehtisab bahut der tak raha