dil wo dil jo bane KHazana-e-ishq

dil vo dil jo bane ḳhazāna-e-ishq

lab vo lab jis pe ho fasāna-e-ishq

dard-angez hai tarāna-e-ishq

kyā junūñ-ḳhez hai fasāna-e-ishq

aah be-sāḳhta nikal aa.ī

yaad aaya jahāñ zamāna-e-ishq

nazar aaya jahāñ vo naqsh-e-qadam

jhuk ga.e paḌh liyā dogāna-e-ishq

zulf-e-ḳhūbāñ sañvārne ke liye

allah allāh banā hai shāna-e-ishq

husn kī zulf bikhrī hī rahtī

nahīñ bantā kahīñ jo shāna-e-ishq

bahr-e-tambīh-e-āshiq-e-be-ḳhud

yād-e-gesū hai tāziyāna-e-ishq

ai papīhā tujhe hai kis kī dhun

tere lab par hai kyoñ tarāna-e-ishq

tiir vo tiir jis ko vo pheñkeñ

dil vo dil jo bane nishāna-e-ishq

tum ġhazal meñ likhā karo 'muztar'

qissa-e-husn yā fasāna-e-ishq

dil wo dil jo bane KHazana-e-ishq

lab wo lab jis pe ho fasana-e-ishq

dard-angez hai tarana-e-ishq

kya junun-KHez hai fasana-e-ishq

aah be-saKHta nikal aai

yaad aaya jahan zamana-e-ishq

nazar aaya jahan wo naqsh-e-qadam

jhuk gae paDh liya dogana-e-ishq

zulf-e-KHuban sanwarne ke liye

allah allah bana hai shana-e-ishq

husn ki zulf bikhri hi rahti

nahin banta kahin jo shana-e-ishq

bahr-e-tambih-e-ashiq-e-be-KHud

yaad-e-gesu hai taziyana-e-ishq

ai papiha tujhe hai kis ki dhun

tere lab par hai kyon tarana-e-ishq

tir wo tir jis ko wo phenken

dil wo dil jo bane nishana-e-ishq

tum ghazal mein likha karo 'muztar'

qissa-e-husn ya fasana-e-ishq