dil ye kahta hai ki ek aalam-e-muztar dekhun

dil ye kahtā hai ki ik ālam-e-muztar dekhūñ

bārish-e-sañg meñ logoñ ko khule sar dekhūñ

phir vo muusī kā asā niil kā shaq ho jaanā

fauj fir.aun kā maiñ Dūbtā manzar dekhūñ

aa.ine toḌ ke dauḌūñ maiñ kisī jañgal ko

apnī sūrat ko kisī jhiil ke andar dekhūñ

merā sab le lo mujhe ek mohabbat de do

shahr meñ aisī bhī āvāz lagā kar dekhūñ

jāntā huuñ ki chhupā hai vo kahīñ siine meñ

kaash is dard kī sūrat ko maiñ bāhar dekhūñ

us ne ik roz mohabbat se bulāyā thā mujhe

maiñ to har roz use apne barābar dekhūñ

duur tak ek hī manzar hai makānoñ kā 'zahīr'

kis taraf jā.ūñ maiñ kis or mirā ghar dekhūñ

dil ye kahta hai ki ek aalam-e-muztar dekhun

barish-e-sang mein logon ko khule sar dekhun

phir wo musi ka asa nil ka shaq ho jaana

fauj firaun ka main Dubta manzar dekhun

aaine toD ke dauDun main kisi jangal ko

apni surat ko kisi jhil ke andar dekhun

mera sab le lo mujhe ek mohabbat de do

shahr mein aisi bhi aawaz laga kar dekhun

jaanta hun ki chhupa hai wo kahin sine mein

kash is dard ki surat ko main bahar dekhun

us ne ek roz mohabbat se bulaya tha mujhe

main to har roz use apne barabar dekhun

dur tak ek hi manzar hai makanon ka 'zahir'

kis taraf jaun main kis or mera ghar dekhun