dil ye KHamosh tha hum zaban mil gae

dil ye ḳhāmosh thā ham zabāñ mil ga.e

sab kahāñ se chale the kahāñ mil ga.e

jo itā.at-pazīrī huī zābta

phuul sahrā ke bhī darmiyāñ mil ga.e

naqs ġhairoñ ke jin kī mazammat thī kī

vo to mere hī andar nihāñ mil ga.e

sar jhukāyā hī thā inkisārī meñ jo

mujh ko qadmoñ ke tere nishāñ mil ga.e

ik bashar na milā jo chale saath meñ

phir jo milne lage kārvāñ mil ga.e

pyaas aisī ki pyāsī kī pyāsī rahī

is zamīñ ko bahut āsmāñ mil ga.e

sab ayaañ ho gayā jo kahā bhī na thā

mujh ko aise bhī kuchh rāz-dāñ mil ga.e

rū-ba-rū jab vo bichhḌe to ġhamgīn the

ḳhvāb meñ jo mile shādmāñ mil ga.e

ātish-e-hijr meñ dil sulagtā rahā

ruḳh pe kitne hī dariyā ravāñ mil ga.e

dil ye KHamosh tha hum zaban mil gae

sab kahan se chale the kahan mil gae

jo itaat-paziri hui zabta

phul sahra ke bhi darmiyan mil gae

naqs ghairon ke jin ki mazammat thi ki

wo to mere hi andar nihan mil gae

sar jhukaya hi tha inkisari mein jo

mujh ko qadmon ke tere nishan mil gae

ek bashar na mila jo chale sath mein

phir jo milne lage karwan mil gae

pyas aisi ki pyasi ki pyasi rahi

is zamin ko bahut aasman mil gae

sab ayan ho gaya jo kaha bhi na tha

mujh ko aise bhi kuchh raaz-dan mil gae

ru-ba-ru jab wo bichhDe to ghamgin the

KHwab mein jo mile shadman mil gae

aatish-e-hijr mein dil sulagta raha

ruKH pe kitne hi dariya rawan mil gae